ਤਾਜਾ ਖਬਰਾਂ
ਅਮਰੀਕਾ, ਇਜ਼ਰਾਈਲ ਅਤੇ ਈਰਾਨ ਵਿਚਾਲੇ ਵਧਦੇ ਜੰਗੀ ਤਣਾਅ ਦਾ ਅਸਰ ਹੁਣ ਪੰਜਾਬ ਦੇ ਪੈਟਰੋਲ ਪੰਪਾਂ 'ਤੇ ਸਾਫ਼ ਦੇਖਣ ਨੂੰ ਮਿਲ ਰਿਹਾ ਹੈ। ਤੇਲ ਦੀ ਕਿੱਲਤ ਹੋਣ ਦੇ ਡਰੋਂ ਸੂਬੇ ਭਰ ਵਿੱਚ 'ਪੈਨਿਕ ਬਾਇੰਗ' (ਘਬਰਾਹਟ ਵਿੱਚ ਖ਼ਰੀਦਦਾਰੀ) ਦਾ ਮਾਹੌਲ ਬਣ ਗਿਆ ਹੈ। ਜਲੰਧਰ, ਲੁਧਿਆਣਾ ਅਤੇ ਅੰਮ੍ਰਿਤਸਰ ਵਰਗੇ ਵੱਡੇ ਸ਼ਹਿਰਾਂ ਵਿੱਚ ਸ਼ੁੱਕਰਵਾਰ ਸਵੇਰ ਤੋਂ ਹੀ ਪੈਟਰੋਲ ਪੰਪਾਂ 'ਤੇ ਗੱਡੀਆਂ ਦੀਆਂ ਮੀਲਾਂ ਲੰਬੀਆਂ ਕਤਾਰਾਂ ਦੇਖਣ ਨੂੰ ਮਿਲੀਆਂ।
ਜਲੰਧਰ ਦੇ ਬੀ.ਐਮ.ਸੀ. ਚੌਕ ਨੇੜਲੇ ਪੈਟਰੋਲ ਪੰਪ 'ਤੇ ਤੇਲ ਦਾ ਸਟਾਕ ਮੁੱਕਣ ਕਾਰਨ ਸੇਵਾਵਾਂ ਬੰਦ ਕਰ ਦਿੱਤੀਆਂ ਗਈਆਂ ਹਨ। ਸੇਲਜ਼ਮੈਨ ਸੁਦਰਸ਼ਨ ਸਿੰਘ ਅਨੁਸਾਰ, ਮੰਗ ਇੰਨੀ ਵਧ ਗਈ ਕਿ ਸਟਾਕ ਸਮੇਂ ਤੋਂ ਪਹਿਲਾਂ ਹੀ ਖ਼ਤਮ ਹੋ ਗਿਆ। ਅਜਿਹੀ ਹੀ ਸਥਿਤੀ ਲੁਧਿਆਣਾ ਦੇ ਭਾਰਤ ਨਗਰ ਚੌਕ ਵਿਖੇ ਦੇਖਣ ਨੂੰ ਮਿਲੀ, ਜਿੱਥੇ ਭੀੜ ਨੂੰ ਕਾਬੂ ਕਰਨਾ ਮੁਸ਼ਕਲ ਹੋ ਗਿਆ ਅਤੇ ਤੇਲ ਖ਼ਤਮ ਹੋਣ 'ਤੇ ਪੰਪ ਬੰਦ ਕਰਨਾ ਪਿਆ।
ਵਧਦੀ ਭੀੜ ਅਤੇ ਤੇਲ ਦੀ ਕਾਲਾਬਾਜ਼ਾਰੀ ਨੂੰ ਰੋਕਣ ਲਈ ਲੁਧਿਆਣਾ ਅਤੇ ਚੰਡੀਗੜ੍ਹ ਵਿੱਚ ਪ੍ਰਸ਼ਾਸਨ ਨੇ ਸਖ਼ਤ ਕਦਮ ਚੁੱਕੇ ਹਨ। ਹੁਣ ਤੇਲ ਸਿਰਫ਼ ਗੱਡੀਆਂ ਦੀਆਂ ਟੈਂਕੀਆਂ ਵਿੱਚ ਹੀ ਭਰਿਆ ਜਾ ਰਿਹਾ ਹੈ; ਕੈਨੀਆਂ, ਡਰੰਮਾਂ ਜਾਂ ਬੋਤਲਾਂ ਵਿੱਚ ਪੈਟਰੋਲ-ਡੀਜ਼ਲ ਦੀ ਵਿਕਰੀ 'ਤੇ ਮੁਕੰਮਲ ਪਾਬੰਦੀ ਲਗਾ ਦਿੱਤੀ ਗਈ ਹੈ।
ਤੇਲ ਕੰਪਨੀ 'ਨਯਾਰਾ' ਵੱਲੋਂ ਪੈਟਰੋਲ 'ਤੇ 5 ਰੁਪਏ ਅਤੇ ਡੀਜ਼ਲ 'ਤੇ 3 ਰੁਪਏ ਦੇ ਵਾਧੇ ਤੋਂ ਬਾਅਦ ਲੋਕਾਂ ਵਿੱਚ ਡਰ ਹੈ ਕਿ ਸਰਕਾਰੀ ਕੰਪਨੀਆਂ (IOC, BPCL, HPCL) ਵੀ ਕੀਮਤਾਂ ਵਧਾ ਸਕਦੀਆਂ ਹਨ। ਹਾਲਾਂਕਿ, ਸਰਕਾਰੀ ਕੰਪਨੀਆਂ ਨੇ ਅਜੇ ਤੱਕ ਕੀਮਤਾਂ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ ਹੈ। ਵੀਰਵਾਰ ਰਾਤ ਤੋਂ ਹੀ ਅੰਮ੍ਰਿਤਸਰ ਅਤੇ ਮੋਗਾ ਵਿੱਚ ਲੋਕ ਤੇਲ ਭਰਾਉਣ ਲਈ ਪੰਪਾਂ ਵੱਲ ਭੱਜ ਰਹੇ ਹਨ।
ਦੂਜੇ ਪਾਸੇ, ਪਠਾਨਕੋਟ ਵਿੱਚ ਹਾਲਾਤ ਫਿਲਹਾਲ ਕੰਟਰੋਲ ਹੇਠ ਹਨ। ਉੱਥੇ ਤੇਲ ਭਰਾਉਣ ਪਹੁੰਚੇ ਮਨੀਸ਼ ਨਾਮੀ ਨੌਜਵਾਨ ਨੇ ਕਿਹਾ ਕਿ ਕੋਵਿਡ-19 ਦੇ ਤਜ਼ਰਬੇ ਤੋਂ ਬਾਅਦ ਲੋਕ ਹੁਣ ਕਿਸੇ ਵੀ ਸੰਕਟ ਲਈ ਪਹਿਲਾਂ ਹੀ ਚੌਕਸ ਰਹਿਣਾ ਚਾਹੁੰਦੇ ਹਨ।
ਪ੍ਰਸ਼ਾਸਨ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਅਫਵਾਹਾਂ 'ਤੇ ਯਕੀਨ ਨਾ ਕਰਨ ਅਤੇ ਬਿਨਾਂ ਵਜ੍ਹਾ ਤੇਲ ਦਾ ਭੰਡਾਰਨ ਨਾ ਕਰਨ, ਤਾਂ ਜੋ ਸਪਲਾਈ ਚੇਨ ਪ੍ਰਭਾਵਿਤ ਨਾ ਹੋਵੇ।
Get all latest content delivered to your email a few times a month.
